Напярэдадні Дня ведаў, Дня беларускага пісьменства і пад знакам найважнейшай юбілейнай даты 2024 года — 80-годдзя вызвалення Беларусі ад нямецка-фашысцкіх захопнікаў, аддзел абанемента Брэсцкай абласной бібліятэкі імя М. Горкага з 1 па 30 верасня праводзіць месячнік папулярызацыі сучаснай беларускай кнігі. У рамках месячніка будзе дэманстравацца кніжная выстаўка «Знаёмцеся: сучасная беларуская кніга», пройдуць кансультацыі ля экспазіцыі, у нашых чытачоў будзе магчымасць узяць кнігі, якія спадабаліся, дадому.

    На выстаўцы нашы наведвальнікі ўбачаць лепшыя беларускія выданні, якія з'яўляюцца пераможцамі нацыянальнага і міжнароднага конкурсаў «Мастацтва кнігі», Нацыянальнай літаратурнай прэміі, Дзяржаўнай прэміі Рэспублікі Беларусь, прэміі Прэзідэнта Рэспублікі Беларусь «За духоўнае адраджэнне», будуць прадстаўлены навінкі беларускіх выдавецтваў «Звязда», «Мастацкая літаратура», «Беларуская навука», «Беларуская Энцыклапедыя імя Петруся Броўкі» і інш.

    У якасці прыкладу прадстаўляем аўтара-лаўрэата Нацыянальнай літаратурнай прэміі 2023 года Соф'ю Шах і яе кнігу «Дыядэмная споведзь». Выдавецтва «Беларуская навука», у якім выйшла дадзеная кніга, прапануе ўсім аматарам прыгожага пісьменства першую не толькі ў нас, але і ва ўсёй славянскай паэзіі санетную дыядэму. 

    Пераможцамі Нацыянальнага конкурсу «Мастацтва кнігі» 2023 года сталі выданні: «Прысмак каляровых рэвалюцый» (Мінск, 2023), «Апошнія сведкі» (Мінск, 2023), «Сугучча» (Мінск, 2023), «Тарас на Парнасе» (Мінск, 2023).

    Прэміяй Прэзідэнта Рэспублікі Беларусь «За духоўнае адраджэнне» 2022 года ўдастоены калектыў Цэнтра даследаванняў беларускай культуры, мовы і літаратуры Нацыянальнай акадэміі навук за выпуск навуковага энцыклапедычнага выдання «Гарады і вёскі Беларусі» (Мінск, 2004–2021). 

    Экспазіцыя прадстаўляе жанравую разнастайнасць: кнігі, брашуры, альбомы, даведачныя і энцыклапедычныя выданні, фотаальбомы і многае іншае, напоўнена як мастацкай, так і навукова-папулярнай літаратурай.Запрашаем азнаёміцца з беларускай кнігай XXI стагоддзя. 

Аддзел абанемента 

+375 162 57 48 09