19 красавіка 2026 года ў чытацкім клубе «КанТэкст» Брэсцкай абласной бібліятэкі імя М. Горкага адбылася па-сапраўднаму чароўная сустрэча, прысвечаная перапляценню тэатральнага мастацтва і літаратуры. Тэма вечара — «Ад сцэны да кнігі» — дазволіла ўдзельнікам акунуцца ў шматгранны свет тэатра, які Уладзімір Маякоўскі трапна назваў «не люстэркам, а павелічальным шклом».

Спачатку ўдзельнікі клуба адправіліся ў захапляльнае падарожжа па гісторыі тэатра, узгадалі антычных майстроў слова і думкі Гамера і Арыстоцеля. Асаблівую ўвагу надалі несмяротным творам Уільяма Шэкспіра — «Гамлету» і «Генрыху IV», пастаноўкі якіх пакарылі і працягваюць пакараць сэрцы гледачоў па ўсім свеце.

Цэнтрам ажыўленых дыскусій стаў культавы раман Уільяма Самерсета Маэма «Тэатр». Удзельнікі абмеркавалі не толькі захапляльны сюжэт і атмасферу рамана, але і яго галоўную гераіню Джулію — жанчыну, чыё жыццё — гэта тэатр, у якім правілы гульні ўстанаўлівае яна сама. Паралелі з вядомай экранізацыяй з Віяй Артманэ і знакамітым выслоўем «Увесь свет — тэатр, а людзі ў ім — акцёры» нікога не пакінулі абыякавым. Галоўная выснова — як важна заставацца сабой, асабліва ў коле сям'і.

Не абышлі бокам і аўтабіяграфічную кнігу Фёдара Шаляпіна «Маска і душа», дзе ажываюць старонкі гісторыі прыватных і імператарскіх тэатраў, іх побыт і значэнне ў пераломныя гістарычныя моманты.

Натхніў удзельнікаў і маналог Таццяны Даронінай аб тэатры, які прагучаў у аўдыёзапісе. Сучаснае балетнае мастацтва таксама атрымала сваю долю ўвагі — абмяняліся ўражаннямі аб кнігах Мікалая Цыскарыдзэ «Мой тэатр».

Не менш займальным стала знаёмства з п'есай Джона Марэла «Смех лангусты», прысвечанай апошнім дням легендарнай Сары Бернар, яе спробам асэнсаваць уласнае жыццё праз тэатральнае мастацтва. Гісторыя, расказаная Канстанцінам Паўстоўскім у «Раскапаным вераб'і», дазволіла зірнуць на тэатр вачыма дзіцяці.

Завяршэннем вечарыны стала яркая тэатралізаваная віктарына, якая пазнаёміла гасцей з багатым тэатральным жыццём Брэста, яго прэм'ерамі і ўжо ўпадабанымі пастаноўкамі. Традыцыйна, сустрэча завяршылася аўтарскім вершам, прысвечаным магіі тэатра. Атрымалася пазнавальна, весела і неверагодна атмасферна!

Аддзел абанемента

+375 162 57 48 09