З 1 лістапада 2023 г. у аддзеле літаратуры па мастацтве дэманструецца выстава «Пад знакам Кіно», прысвечаная Мінскаму міжнароднаму кінафестывалю «Лістапад». Найбуйнейшы кінафорум Беларусі праводзіцца штогод з 1994 г. ў Мінску, да 2002 г. насіў назву «Кінафестываль краін СНД і краін Балтыі», у 2003 г. афіцыйна набыў статус міжнароднага, у 2013-м Мінскі міжнародны кінафестываль «Лістапад» атрымаў пастаянную акрэдытацыю. Галоўнай мэтай дадзенага кінафоруму з’яўляецца, як і было заяўлена з самага пачатку, — папулярызацыя кінамастацтва ў Рэспубліцы Беларусь.

Асаблівую ўвагу фестываль удзяляе нацыянальнаму кіно. Традыцыйна тут паказваецца толькі найлепшае аўтарскае кіно. Кожны год «Лістапад» праходзіць пад пэўным слоганам, у 2023 г. — «Ствараем будучыню». Праграма кінафестывалю багатая і насычаная. У гэтым годзе ён пройдзе з 17 па 24 лістапада. На ММКФ «Лістапад» працуе некалькі складаў міжнароднага журы, кожнае з якіх вызначае пераможцаў і ўручае прызы ў намінацыях. У рамках фестывалю ладзяцца цікавыя сустрэчы, творчыя майстар-класы і дыскусіі. Асноўны конкурс ігравых фільмаў традыцыйна карыстаецца папулярнасцю ў гледачоў. Штогод фестываль наведваюць больш за 40 тыс. гледачоў.

У кнізе «Минский международный кинофестиваль „Лістапад“: 20 лет спустя» (Мінск, 2013) Л. Саянковай разглядаецца гісторыя міжнароднага кінафестывалю з моманту яго стварэння і да таго часу, калі ён стаў па-сапраўднаму Міжнародным кінафорумам. На старонках часопісаў «На экранах» і «Мастацтва» вы знойдзеце звесткі пра фільмы, якія прадстаўлены ў конкурснай праграме «Лістапада», пачытаеце інтэрв’ю з рэжысёрамі гэтых кінаработ, азнаёміцеся з інфармацыяй пра вынікі фестывалю.

На выстаўцы прадстаўлены кніжныя і перыядычныя выданні. Прапануем наведаць выставу, якая будзе адкрыта для прагляду да канца лістапада.

Аддзел літаратуры па мастацтве

+375 162 57 78 48