Брэсцкая абласная бібліятэка імя М. Горкага |
|
Брэсцкая абласная бібліятэка імя М. Горкага |
|
30 верасня 2023 г. прафсаюзным камітэтам Брэсцкай абласной бібліятэкі імя М. Горкага для супрацоўнікаў установы была арганізавана экскурсійна-турыстычная паездка па славутасцях Іванаўскага раёна (Брэсцкая вобласць).
Першым пунктам маршруту стала цэнтральная раённая бібліятэка імя Ф. І. Панфёрава, экскурсію па якой правяла дырэктар А. І. Данількевіч. Алена Іванаўна азнаёміла з дзейнасцю бібліятэкі і апошнімі актуальнымі праектамі, сярод якіх — ландшафтна-культурны парк макетаў «Лабірынт часу». Праект уяўляе сабой аглядную круглую пляцоўку пад адкрытым небам з усталяванымі вакол яе ў храналогіі мініяцюрамі згубленых славутасцяў раёна: сядзібнага дома Гедройцаў, палаца Скірмунтаў, гаспадарскага дома-сядзібы Дастаеўскіх, летняй рэзідэнцыі Войцэха Пуслоўскага, дома Хаіма Вейцмана, Петрапаўлаўскай царквы ў в. Махро і інш.
Далей мы наведалі Іванаўскую дзіцячую бібліятэку, аб дзейнасці якой расказала загадчык Т. В. Шумак. Фонд бібліятэкі налічвае больш за 20 тыс. экзэмпляраў дакументаў, у структуры — малодшы і старэйшы абанемент, чытальная зала.
Наступным пунктам маршруту стаў аграгарадок Дастоева, адкуль бярэ карані род пісьменніка Ф. М. Дастаеўскага. Тут у будынку школы знаходзіцца літаратурна-краязнаўчы музей Ф. М. Дастаеўскага з фондам больш за 3 тыс. экспанатаў. У музеі захоўваюцца сапраўдная фатаграфія Дастаеўскага (1878 г.); біяграфія пісьменніка (1891 г.) у выдавецтве Паўленкава; раман «Бедныя людзі» (1912 г.); дакладная копія рукапіснага тэксту пісьменніка; напісаная сынам Дастаеўскага Федзей запіска бацьку і інш. каштоўныя экспанаты. Захавальнік фондаў В. М. Пуцыковіч расказала і пра гісторыю рода Дастаеўскіх, і пра самога Фёдара Міхайлавіча, і пра вёску Дастоева.
Выдатным надвор'ем сустрэў нас раённы музейны комплекс імя Напалеона Орды ў в. Варацэвічы, які ўключае музей Н. Орды, карцінную галерэю і сядзібны дом Н. Орды. Навуковы супрацоўнік музейнага комплексу, нястомны даследчык і папулярызатар спадчыны Напалеона Орды і не толькі Л. Г. Дрычыц азнаёміла з экспазіцыямі карціннай галерэі і музея. Па сядзібным доме была праведзена тэатралізаваная экскурсія ад імя пляменніцы мастака Хелены Скірмунт.
Сумесныя экскурсійныя паездкі па родным краі сталі добрай традыцыяй у калектыве. Зносіны ў нефармальнай абстаноўцы і новыя ўражанні дапамагаюць умацаванню каманднага духу і згуртаванню калектыву. Разам адкрываць Беларусь — цікава!
Аддзел маркетынгу і сацыякультурнай дзейнасці
+375 162 57 48 76